هب البراد

جوٍ ينومسني على قول الأبيات
النار والدلة مع البن والهيل
تشفي غليل اللي خذته الدوامات
أطرب ليا جتني علوم الرياجيل
سوالف أهل الصيد روحه وجيات
لا قالو إن العشب راهي بعد سيل
وإن القطا شفناه في كل الأوقات
وراع الحباري كل وجه تهاليل
يقول طيري صادها بالثويرات
العام فرخ ولا تعود على الشيل
واليوم له في ذبحة الخرب عادات
طلع لها بعيون مثل الدرابيل
تل السبوق وطاريم السماوات
ويوم انصرم كنة حصاة الأبابيل
مزع حوايا القلب والقلب ما مات
هذي غناة امفارقين البهاذيل
اللي لهم فالبر صوله وجولات
هذي مسارينا على الله تساهيل
سجة قدم نفرح بها كل حزات
كلن ذكر عشقه بزين التماثيل
وأنا هواي الصيد يأهل الهوايات
منصور حماد الحرّي - القصيم