معلمٍ ماهر بفعل القديمين حب التراث مجمعه في معانيه

صوت الصورة

جاك اللبن والطين يحكي زمانه
يعيد ماضي راح من مدت اسنين
على صروح المجد عمر مكانه
يوم الوجيه الطيّبه تبني الطين
اطيب ثرى يخلط ويصبح ميانه
كفاح في وقت الشقا .. والمعادين
يا وقت خلك شاهدٍ مع ضمانه
كيف التطور جاك من حين لاحين
حمد عبدالله الوايلي - حوطة سدير
هذي هي الذكرى بالعهد القديم
ذكرى بيوت الطين بعصر اجدادنا
واليوم راحت والتراث اصبح عديم
نحتاج وقفه في تراث بلادنا
شوفوا هالنشمي بدا الفعل السليم
بوقفته واحياه لاجل اسعادنا
بلبسه اللي قديم من الصميم
لاجل عيال اليوم وايضا احفادنا
محمد عبدالعزيز الخنيفر - أشيقر
بيت الشِّعر خلفه وشغال بالطين
يضبّط المنظر ويبنيه بيديه
معلمٍ ماهر بفعل القديمين
حب التراث مجمعه في معانيه
شيٍ عجيب وشجعوه الملايين
على الملا منشور عمت مماشيه
علي الرشيد - رياض الخبراء
من حول نص القرن والاستاد ماجود
بشبه الجزيره يبني بيوت من طين
متوقف عن شغلته خمسه عقود
ليعاد ماروث الجدود القديمين
لبنه وطينه ومن الاثل يابس العود
وسعف النخل فوق الخشب عرض شبرين
في القيض بارد وفي الشتا الناس دافين
عازل طبيعي منظره يجذب العين
سعود عبدالعزيز الهزاع – نعام
يا زين وقت اللبن والطين
الكل يفزع مع الثاني
مافيه كهرب .. ولا خطين
وينور سراج دناني
واليوم صار التراث الزين
يحكي لنا ماضي ازماني
عبدالكريم عبدالرحمن السلوم - القرائن
هذي فعول اجدادنا بماضيٍ فات
شافوا بها الاتعاب وايضا البهاذيل
يا مالهم بالكد روحه وجيات
من اجل لقمة عيش بالحط والشيل
فيهم طهارة قلب مع طيب نيّات
وعلى التعاون دون قالٍ .. ولا قيل
واجب علينا احيا عهودٍ قديمات
لاجل عِيال اليوم جيلٍ ورى جيل
ريان محمد الخنيفر
الجدود اللي لهم عندي احترام
نرفع الرايه لهم والقبعه
عمرو الدنيا وهي كانت حطام
رغم القل والبطن مابه ما يشبعه
بالجنادريه لهم عز ومقام
صورةٍ تسحر بالإبداع منوعه
خالد ناصر المخيمر - روضة سدير
نرحب بمشاركاتكم الشعرية وما تلتقطه عدساتكم من الصور الهادفة والطريفة على إيميل الخزامى:
rb-khozama@alriyadh.com
ويا هلا..
صورة العدد السابق