البلور

مساء بنكهة السّكر مساءٍ يشبه البلّور
عليك القي تحيّة حب تليق بوصفك الراقي
من أجمل ما خلق ربّي صفاتك كلّها من نور
حسبت النّور بحْضورك لهيبٍ ينوي إحراقي
من الأعلى إلى الأسفل بنيت مْن الجمال قصور
خذيت الزين والباقي؟ وش الباقي وش الباقي؟
مشآعر تحتوي قلبي تفزّ وتحترق وتْثور
وكنّي شايله بْقلبي مشاعر هزّت أشواقي
صحيح انّك بشر لكن جمالك صابني بشْعور
شعورٍ يشبه (الكلمة) إذا ضاعت من أوراقي !
يقول القلب خلّيني بدوّر غيره (المغرور)
حشا غيرك يابو هاشم حشا والله مو لاقي!
لو إني ما بغيت امدح ولكن بيّح المستور
غرامك وانجبر قلبي يرددها من أعماقي
صحيح إن (الحزن) لوني.. ولكنّ (الغزَل) مهذور
من إحساسي إلى منّك قدرت تْشبع أذواقي
وأزيدك في الشعر بيتٍ أنا لي من ثمان شْهور
أحاول اكتب أبيات تليق بوصفك الراقي