ليتك تجاوبني

يا قبر مروح الغيث يسقيك
يسقيك ربي من صدوف الخيالي
ماهو علشانك علشان راعيك
أنشهد إن اللي نزل فيك غالي
يحدني وقت من الضيق وأجيك
وأجلس على جالك وحيدة لحالي
ياقبر أغليك من واحد فيك
وجدي على شوفته ويابري لحالي
ليتك يابوي مع العرب حي وأرجيك
لو غبت عن عيني سنينٍ طوالي
ليتك تجاوبني ليما قمت أناديك
وأشكي عليك صدوف الليالي
شالوك من عندي وأنا قمت أباريك
هاك النهار الصبح ياشين فالي
وحطوك في قبر وحيش هيالي
وعيوني استرسلت بالدمع مما جرالي
لو طالت الأيام ماني بناسيك
مرحوم ياعز الرفيق الموالي
ماني ياعين من الدمع ناهيك
مادام يصلاني من الهم صالي
أبكي على حاضر زمانك وماضيك
وعسى العوض في مقبلات الليالي
الكودا بنت عبدالعزيز الدريعان - شاعرة سعودية