دمعة القلب

انزفي يا دمعة القلب انزفي
دام ما به من يقدّر له وفاه
ورددي لحن المفارق واعزفي
نغمة التوديع لو ردّد نداه
وبيّحي سدٍ على العالم خفي
ما استفدنا شي يذكر من خفاه
ما درا به كود صاحبنا الجِفي
من خذا من الحب صافي منتهاه
وصار كنّه من غرامي مكتفي
ولا أبد فكّر يردّ اللي خذاه
عيبي إني كنت عاشق له وفي
وغلطتي إني عطيته مبتغاه
كنت أنا ويّاه جداً عاطفي
وماحسبت حساب شيٍ ما أراه
الأمل في الجرح يومٍ يختفي
ويستريح البال من حزنٍ كساه
مع نزيف الدمع من قلبٍ وفي
والدموع علاج للهم ودواه
عبدالله المانع - شاعر سعودي