الجروح القديمة

المدى ليل وأنفاس المسافة ظروف
والجروح القديمة باقيّة ما شفت
قلت أضم القصيد اللي تبعثر حروف
يمكن الشعر يشعل شمعةٍ لي طفت
طحت عاشق غيور ولا قويت الوقوف
من مصابي روّت عين القهر وارجفت
بين شرهة غرام وجرح عيّا يروف
جيت أقهوي همومٍ من نحيبي لفت
يا عذابي لبس شمس الحنين الكسوف
وأنت تكوي عيونٍ من ضماك انشفت
يوم ناي المواجع عند سمعي عزوف
لعنبوها عواطف كانها ما أعطفت
يالخفوق العما هدّك خفوقٍ يشوف
يوم رجلك على درب أشتياقك حفت
صاحبي لا لحق قلبك مضامي وخوف
قيس بحر المشاعر كان عينك رفت
ما طعنت الهوى واللحقت فيك الحسوف
جيت أبرر شغف قلبٍ وعينٍ وفت
شادن الروض يا قايد جموع الخشوف
المدى فيك ليلة شوق جت واحتفت
لك وقف نبض قلبي والمحاني صفوف
لو عيوني على شانك بكت وانزفت