الحاجة أم الاختراع ...

محتاجة لك... والحاجة أم الاختراع
يا اللي تسافر... كل ما احتجت لك
ما قلت لك: إني م... اتحمل وداع
وداع ما أتحمله... ما قلت لك؟!
الطير... بين الغيم وأطراف الشراع
والموج... والورد الندي اللي جبت لك
كل حاجة تردد وراي ب... انصياع:
اشتقت لك... اشتقت لك... اشتقت لك
يا اللي حضورك قوت... وعيوني جياع
تبي الصراحه؟!... كل أبوني جعت لك
أشعلت لك قلبي من اللهفة... وماع
ليته ما ماع... وليتني... مَ... أشعلت لك
في وقت صار الكل..."لبّيسة"قناع
مع إني جدًا واضحة... وضّحت لك:
إن المطر ينزل عشان... الارتفاع
واني علشان ارتفع... نزلت لك
وان ضيقتي لا بد معها... اتساع
وان اتساعي يْزيد... كلْ ما ضقت لك
كلْ ما أفوق... يموت في عيني شجاع
وكلْ ما أموت شوي... قمت وفقت لك
أمتع خطايا حبي - لك - الاندفاع
واخطى مُتَع حبك... ليا فضفضت لك
رددت لك... سافر وضيعني وضاع
وأنا اختنق بشويش... لا رددت لك
يا اللي ذبل تشرين... من قلت: الوداع
لا تْقول بعدين: إنْ أنا ما قلت لك
إما لأجل أوصَلْك... بَعْمَل اختراع
وإلا لا عاد تسافر... إذا احتجت لك