كملي من غيري يومك

كمّلي من غيري يومك
لا يموت اليوم فجأة..
أو تضيع اللحظة..
وسط صمتي..
أو همومك.
كمّلي من غيري يومك
ماني عاتب
ولاّ يا عمري بلومك.
رتّبي مكياج صبحك
كحّلي بالحب ليلك
مشّطي شعر الدقايق
عطّري حضن المكان
.. والبسي أحلى هدومك
صالحي وقتك وعيشي..
لا تموت فيك الأماني
افتحي صدر النوافذ..
للأغاني..
خلّي ألوان الفرح
ترسم النبض برسومك
ليش عمرك فيك يذبل؟!
ليش يصير الليل أطول؟!
ليش وانتي.. الفي قلبك
يحترق ورد الأمل..
من هجيرك.. أو سمومك؟!
كمّلي من غيري يومك.
انسي اني في حياتك
انسي اني لك حبيب
أنا مثل ما تشوفين.. يائس
والفرح فيني كئيب
ماني قادر..
أرفع عيونك سما
أو أصحي فيك فجرك
وانثر العطر بقدومك
الملل يشربني كلي
مثل ما نفس الملل..
يسكن عيونك.. وياخذ..
من حكي قلبك علومك
الملل ظلل هوانا..
ما بقى في صوتي قمره
وانطفى الضي بنجومك
المشاعر فينا جفّت..
لا ربيع ايديني ينفع
لا.. ولا ماطر غيومك!
كملي من غيري يومك!
مسفر الدوسري