الحقيقة - شلخ

والله الدعوى اليوم شكلها تكسير رووس وشلخ... يا إما ينهزمون الهلاليين وتصير فضيحتهم بجلاجل.. يا إما ينهزم النصراويين وصحيح إنو هذا طبيعي... بس برضو مع الطعطعه اللي هم فيها.. وجية الريس الذهبي.. صعبة تكون البداية كذا... بس تبون الصراحة صدق الريس الذهبي.. تطلع فرق.. تنزل فرق تظل مباراة الهلال والنصر لها نكهة خاصة...
بس أنا ودي أقول لحقين القنوات الفضائية وراء ما تسجلون التصريحات قبل المباراة وتعرضونها بعد المباراة.. لأنو المسألة محسومة.. أكيد فيه ضربة جزاء ما احتسبها الحكم.. وأكيد فيه كرت أحمر ما خذاه مدافع.. وأكيد الفريق اللي انهزم هو أحسن فريق في الشرق الاوسط لو ما الحكم وقف ضده.. أما الفريق اللي فاز فبيطيروه جماهيره في السماء حتى لو كان داج في المباراة.... والوعد عنوان الجرايد بعد المباراة..
عموماً بحكم إني أشجع برشلونه... فاعصابي ثلج في هالمباراة.. وأتمنى بس إني أستمتع بمباراة حلوه أقشم فيها حب واجد.. بعيداً عن لخبطة الحلوى ومحاولات إلياس... عموماً أنا أشوف أن هالمباراة فرصه لسامي الجابر... إنه يتدلع على البزارين خاصة إنه أستقعدلها من أول وترك الجائزة لصديقه المنتشري... فلازم يبيض الوجه في هالمباراة وإلا بيقولون له.. ليتك رايح.
ابن البلد
iabalad@maktoob.com