الحقيقة - الله يعينك

تذكرون يوم أقولكم أنا ي "البروفسور" محاكيكم ... إن حطة القروني في درجة الشباب تمهيد للفريق الأول... ومثل ما قلت صار... ومن حقي إني أتدلع عليكم... وما ودي أسوي مثل الجرايد وأقول"كما ذكرت في العدد رقم وتاريخ"...
بس ما أقول إلا الله يعينك يالقروني... قدامك مشوار صعب... ومعك"جمهور"مقتنع إنه ممكن يحقق البطولة العربية ويتأهل لمونديال الأندية لا تسألوني أشلون..! عموماً ووالله ما راح يرحمك لو تنهزم حتى من"ريال مدريد"... بس ما عليك إنت كفاءة وطنية جيدة...
بعدين ودي أقول يا جماهير النصر... اثقلوا شوي... لا تطيرون بالعجة عشان فريقكم تأهل لدور الثمانية في"العربية"... ترى فريقكم تأهل وهو مهزوم بإثنين صفر... والمباراة ما شفنا فيها غير"الخوجلي"وهو يتسدح يمين ويسار وكن المباراة بين أسفي والخوجلي... ذكرنا بالدعيع أيام عز دفاع الهلال... أو حتى يوم إنه مع الطائي... لا تحسبوني ضدكم... لكن أنا ودي تقتنعون بواقعكم ومثل ما نصحتكم من زمان... اشتغلوا زين وجيبو لعيبه من جوا ومن برا... ما عندكم غير حارس ومهاجم... والبقية"ما عندك أحد... وتراكم محتاجين عشرة أجانب من نمونة"كماتشو"و"أترام"، مهوب من اختيارات الخبير اللي وهقكم عشان الفريق يصير يجمل... لازم تفكرون بالمنطق وأتركوا عنكم فريقنا"عالمي"وهالسوالف القديمة اللي ترجعكم ورا... وأدرى إنكم تبون البطولة ب"اللي هيبه"... بس"من يطلب الحسناء لا يغلها المهر"... يا هووه علي...
ابن البلد
iabalad@maktoob.com