الحقيقة - أنا والخازن و "التوهيق"

طبعاً كنت ماخذ في نفسي مقلب، ومتوقع أني ضربت كتّاب الجريدة، واني أهم من الفراج ومنيف والجبرتي والمهنا والشباب الباقين... لا ومن زيادة الثقة بعد، قلت ان أنا عند الجماعة أولى من السويد والشعلان، وأرقام المبيعات زادت بعد كتاباتي، واني الحين يعني"تواضعاً"يعتبروني بعد الزميل جهاد الخازن مباشرة، وأنافسه أحياناً - هاه كيف الزميل جهاد حلوة -.
المهم هاالغرور بغى"ينكبني"تدرون ليش، لأن الجريدة قالوا"ضف"زاويتك للصفحة اللي وراها من أول رمضان، لأنك راعي"حش"واجد، وهذا مكانك الطبيعي - يعني قربنا أكثر لنهاية الجريدة - طبعاً زعلت، وقلت"معصي"لأني"بزعمي"واثق.
بس تبون الصراحة شفتهم"مصملين"وماعندهم فيني، وقلت الحق ياولد ووافق لايقولون مع السلامة... بس سويت نفسي قدامهم اني وافقت عشان قرائي - أما عاد قرائي - عشان أحافظ على"برستيجي"قدامهم.
بس أنا واثق انكم من بكرة بتقرون الصفحة الثانية في الرياضة قبل الأولى عشاني، أوووه عودنا للمطرسة والغرور".
المهم واللي يرحم والديكم لا تعلمون الجريدة باللي قلت لكم، عشان مايدرون اني مندفع ومتمسك بقوة في الكتابة عندهم، وأحافظ على ماتبقى من مكانتي عندهم... هاه اتفقنا ما في"توهيق".
ابن البلد
iabalad@maktoob.com