الحقيقة - "إن لم تستح فلا تستقل"

حقيقة في رؤساء أندية ما تدري وش يبون؟ غير "الرزرزة والمسمسة بها الشمغ" يعني لا نتائج ولا تطور ومن سيئ إلى أسوأ وإن مثلك خارجياً فضحك، ويوم انجلد في ديربي"السمك"يحط"حرته"في الصحفيين ليش تهاجموني أما انت يا ريس إي سي ميلان"سيلفيو برلسكوني"! - شفتوا ثقافتي كيف عالية؟ بس ما تقدرون - المهم بعود للحبيب... لا انت قادر تعدل أوضاع فريقك، والعام مهدد بالهبوط، ولاجبت أجانب تطلق الوجه، ونحشت اللي يدفعون، وترتيبكم بالدوري يفشل!
بس بفهم وش بتوصل النادي له؟ وليش متكي وما تعطي"سداح"فرصة؟
اللي يشوف اعدادكم ومعسكراتكم ويسمع تصريحاتك يقول انكم الموسم الماضي ما كنتوا تستحقون المنافسة على الهبوط... على العكس كنتوا تستحقون المربع الذهبي... وحرام والله نهائي ولي العهد يكون بين الهلال والقادسية... انتم أولى لأنكم أحسن من القادسية واجد... لا وأذكى بعد... حتى هالسنة المفروض تحققون البطولة الخليجية القوية طبعاً لولا المؤامرات اللي فضحتها يا"الذيب"، بس الله يهديكم لو ما رجعوكم"وصملتوا"على الانسحاب كان كملت الفضيحة.
وش بعد... حتى مباراة أمس ترى انتم أحق بالفوز بس ان اللاعبين جاملوا القصاص لأنه ضيف وبيخدمهم في الصيف.
هاه وش تبي بعد؟ مو حرام هذي نهاية الفارس؟ ما فهمتها بعد؟ طيب ارحم الجمهور والتاريخ بس. وترى على قدر أهل العزم تأتي العزائم قايلكم منب سهل.
ابن البلد
iabalad@maktoob.com