روحي ... سماعة

قلمي يا أمي اعتذر مش لاقي تاني كلام
خلص كلام البشر في وصف أعلى مقام
من عجزه يامَّه انْكَسَر احتار حايكتب ايه
مسك فؤادي الوتر لحّن وقال أنغام
قال ربنا كرمك في محكم التنزيل
شهور يا أمي ف وهن والحَمْلِ حِمْلِ تقيل
وآدي سيدنا النبي قال في حديث معناه
أمك دي أمك وأمك أولى بالتبجيل
والجنة كل المنى دي تحت رجليكي
خليني تحت القدم الله يخليكي
أملي رضا ربنا وانتي الطريق يامه
شاوري يا غالية أؤمري ايه اللي يرضيكي
عامين ونص في تعب بين حمل ورضاعة
وتقضي ليلك سهر نومك يا دوب ساعة
في حضن قلبك أنام دفيان ومتهني
وتغني وتهدهدي وأنا روحي سماعة
أبكر وأنا فرحتك بالحب تسقيني
ومن ضيا بسمتك النور بيهديني
ومن جمال كلمتك عقلي بيتنور
ومن حنان نظرتك لو أعي تشفيني
لو قلت آه اسمعك قلتي أحر الآه
ويبقى ليلك سهر ما بين دعا وصلاة
تدعي إله السما بدموعك الغالية
وستمعي ضحكتي قلبك يقول: الله
نبع الحنان والعطا والحب دا انتي
كل الأمان والصفا برضه الوفا انتي
انتي يا سر الحياة يا رمز كل جميل
لو كل نور انطفى تمحي الظلام انتي
يا أمي حضنك دفا بعده أنا بردان
يا أمي كلك وفا ما يلمسوش نكران
يا أمي تاه الكلام واللحن ما وفّاش
حقك يا زينة الوجود يا رحمة الرحمن
القاهرة - عبدالفتاح خاطر