أميرة

يا أميرة وأنتي أميرة بذوقك
لو ما يكتب أمام اسمك أميرة
بينك وبين البشر تشبه فروقك
فرق سيرة مجدنا عن كل سيرة
حلوة، وفتانة، ومحدٍ يسوقك
للدروب اللي مسافتها قصيرة
عفتك سورٍ بنت ساسه عروقك
من تعداه الله أعلم وش مصيره
وبالحلا ما أظن به حلوات فوقك
أنتي أحلى بنت في شبه الجزيرة
يكفي إنك كل ما لاحت بروقك
جاتك عسوس الهوى من كل ديرة
العسل لو إنْ له لسان ويذوقك
قال سموها العسل وأصيره شيرة
نوخي بين أحدب القضبان نوقك
واشربي من واحة القلب وغديره
واقطفي من ورد شعري ما يروقك
والبسي معقوده وشمي عبيره
وجددي آماله بطلة شروقك
لي متى وعيون شاعرك السهيرة
افتحي يا شوق عيني عين شوقك
وسدي إذن ظنونك بصدق السريرة
دام راسي حي لا شي يعوقك
العسيرة لو طلبتيها يسيرة
والله إن الحب حقٍ من حقوقك
وإنك الأولى بعمري والأخيرة