الحلوة « النعوّمة»

عيني اللي من وصال أحبابها محرومه
مالقت عقب الحبايب واحدٍ يرحمها
حزنها بادي وفيها دمعةٍ مكتومه
دمعةٍ لازاد همي ليني مولّمها
ضاق بالي والسعاده داخلي معدومه
والتعاسه بينٍ في ناظري مقدمها
منطوي والهم يأخذ فوق راسي حومه
كنه الغيمه وبرّاق الوجع قاسمها
صابر ومن جاه ماجاني تضيع علومه
والله انّ تمّره الأنسام ماينسمها
وحدي ومن كان وحده بيغدي بهمومه
يبني صروح الهواجس جوفه ويهدمها
فاقدٍ بنت الكرام الغضّه المحشومه
وخايفٍ لا الشوق يأخذني وأصيح أزهمها
خبري ابها مثل حلمٍ قاطعته القومه
ذكرياتٍ ودي أرجع واغفي وأحلمها
لابدت قلت أقبلي يالحلوه النّعومه
حي والله شوفتك ياجعلني ما أعدمها
تنظر لعيني بعينٍ كن فيها نومه
وتبتسم مدري تبسم عينها أو فمها
عطفها في داخل فوادي تفيض غيومه
أكرمتني بالحنان ولاقدرت أحرمها
من غرامٍ في ضلوعي جذوته مضرومه
لاخبت ناره شوي يولعه مبسمها
بعد ذا غابت وبعثر فقدها المنظومه
وقمت ببيوت القصيد أعيدها وأنظمها
مرزوق الروقي