طعم وصله

قد لي ثلاث أيام مارقت مارقت
كل ماطرالي (طعم وصله) فهقته
إشتقت..إيه إشتقت..وإشتقت..وإشتقت
ولا عنّ قافٍ صوب ريحه طرقته
للحين أنا من طعم حبه فلا فقت
ماهوب أحبه والله إني عشقته
لاجيت أسج شوي عنه وبرقت
أونس بصدري طعم لجّة فشقته
أنا وقلبي يم صوته تسابقت
مدري سبقني القلب وإلا سبقته
بس الوكاد إني بقلبه تعلقت
إلا الوكاد إن أعذب الوقت وقته
على النقا..لاخنت..لابعت..لابقت
إلا غلاه إن ماعطانيه بقته
ليته يعرف المسأله مسألة وقت
ماهوب موضوعٍ يوقع ورقته
أصل الغلا إحساس لو سقت ماسقت
مايمكن إنك تشعره ماشهقته
وإلا شعرت إنك بعشقه تطوقت
يلذ لك قلبك إذا به حرقته
ولاأقبل عليك وقمت ترجف وعرقت
إذكر قليبك وإعرف إنك لحقته
وأنا إلامنه طرالي تعانقت
مع النجوم ولذ لي ماعنقته
ولاغاب مثل الحين..مارقت..مارقت
يعودلي طاريه لامن فهقته