أيش أسوي

ياسلامي للهجوس اللي تصافق في خيالي =مثل صفق الموج لا قام يتصافق بالسفينة
ترتفع بي عن ردي العرف والهرج الهزالي =ما تقود افكاري الا لمحاريف الثمينة
شاعر واصفح عن الهزلات وانحى للجزالي =اتنقى من بنات الفكر واختار السمينة
واقبل الراي الصواب ولا اتعمّد فالجدالي =الجدال يسبب الفرقا ويدني بالضغينة
واتحمل زلّت الصاحب بصبر وباحتمالي =ماني بمثل الهبيل اللي لطم بيديه عينه
واتغاضى واتسامح مع كريمين السبالي =الزحول اللي تلم الشمل وتقود الضعينة
الرجال اهل الشهامة والرجولة والكمالي =ما يخاطون الدليل وكل علم فاهمينه
وانا عندي عرف وخيوط القضية ما تزالي =ولو يحرفها قليل المعرفه تبقى مبينه
ولو غرق مركب جوابي في محيطات السوالي =المثل يقول مابه في هذا الدنيا غبينة
وطالما ان العمر فاني والحياه الى ارتحالي =من بيوت الشعر ما بابني ولا اعمر مدينة
لكن ان طالت هجوسي يا بعيدين المنالي =ودي اسالكم سوال وجاوبوا ياعارفينه
ويش اسوي يارجال العرف واصحاب المعالي = بالغشيم اللي يعد ايساره اغلا من يمينه
ان نصحته صد والبسني جلابيب الظلالي =وشب نيران الفتن والحقد ما بيني وبينه
وده اني معه في رايه ويفرش لي زوالي =واقف بصفه ويحسبني في الباطل عوينه
مير يابالله عليه لو يطولن الليالي =ما عليه تنطلي حيلته لو يضحك جبينه
وان تمادى فالعواجه ما حسبته راس مالي =باشجبه واستنكره وامقته واذمه وادينه