(يا وجودي)

ياوجودي لا أظلم الليل والعالم رقود
واعترض قدام عيني شريط الذاكره
أتذكر مامضالي ولا بحت السدود
خوف تدري عن خفاي القلوب الماكره
والله إن البوح للمشتحن مامنه فود
مير خل هموم بقعا بصدرك حاكره
لاتعرضها الهبايب ويلقطها الحقود
واحدٍ في نقلة الهرج محد يجاكره
مايحل المعضله غير حلال العقود
واكثر نفوس البشر للجمايل ناكره
مير أنا في وجه ربي من عيون الحسود
حاسدٍ ما يذكر الله ولا الله ذاكره
خير مامن خير وإليا هرج غث الكبود
المجالس في وجوده سماها عاكره
ليت ولد اللاش ماله على الدنيا وجود
ما لقى غير المذمه ولا أحدٍ شاكره
والنداوي يكره القاع ويحب الصعود
ولا يجي في ماكرٍ مايشابه ماكره
والزمن لا تامنه بين نقص وبين زود
عشت يومه مير مايندرى عن باكره