روح القصيد

صاحبي صاح بي : شعر الصحافة لهو
.......لو غدا مشرقٍ برّاق زاهي بهي
شاعره من غرور ونظرته من زهو
.......لين يذبل ويذبل كل شعرٍ شهي
ينتقد ما عدا نفسه وشعره 00 وهو
.......شي تافه واقل من التفاهة 00 وهي
شاعره من هنا لآخر حدود السهو
.......ليتها شاعرة بالتربية والطهي
@ @ @
اثر من يوصي بشيٍ يخصه
.......ترجع عليه أكبر ارباحه خساره
اليوم لا جيت ترسل حر وصه
.......الحر ما عاد تكفيه الاشاره
@ @ @
داويت حسادي بما املك من الحب
.......قلت انتزع بالحب شوكة فؤاده
وازداد غي وزاد في غيبتي سب
.......حتى اقتنعت انه يزيد بسواده
اثر القلوب الحاقدة ما لها طب
.......حتى الدوا زوّد مرضها زياده
@ @ @
قالت انته تريد من الملا غيري
.......قلت والعين ما تعلا على الحاجب
انتي اول ويا آخر مشاويري
.......ضحكتي عند غيرك تأدية واجب !!
@ @ @
الشعر واهل الشعر والفقر والطيش
.......والهرج بردٍ نوب ما يبرد الجاش
ما باع شعره من شرى لقمة العيش
.......واللي يعيش الفقر والذل ما عاش
يا كثر ما تسمع من اللاش ( هو ليش ) ؟
.......ويا ثقل كلمة ( ليش ) لا جت من اللاش
@ @ @
كان للفندق ضجيج وكان للضجة سرادق
.......وكنت انا مثل الرماد اللي على كف الذواري
ابدويٍ ما خذت روحه على جو الفنادق
.......موغلٍ فالعشب لو ما للمطر فالبال طاري