( المهرة )

لأول مرة يشاركنا الشاعر عبدالله عوجان من خلال هذا النص وندعوكم لمشاركتنا قراءته والحكم لكم..
مانيب فاقد قصر وحصون وبروج
وْلانيب فاقد دولةٍ محتكرها
وْلا فاقدٍ كرسي ولا فاقدٍ فوج
اصبحت فاقد من عيوني بصرها
فقدتّ من عاشت ورى ضلوعي العوج
المهرة اللي ما ربح من خسرها
مهره بدون الجام وعنان وسروج
مزيونةٍ كلّ الحلا في قمرها
اللي بوسط عيونها انهار ومروج
ما اخصب مروج العين ما اعذب نهرها
لا من مزج دمع النواعيس بالروج
كحل العيون اللي تسود بنظرها
تشوف كيف الليل لا عانق الموج
في وجهها وتطيش بأعمق بحرها
يا بخت من قضّى حياته لها زوج
وْيا بخت من صار ابن عمّ وْحجرها
راحت وخلّت دمعي بعيني يموج
وْلا زال خفّاق الهوى ينتظرها
وْتبقى بمفردها ورى ضلوعي العوج
حتى ولو راحت ولا شيف اثرها