تزين الأوضاع

الضيق بيبانه على صدري اوساع
والهم في عيني مثل ما تشوفه
والبدو حطوا قفل في عوج الاضلاع
"عيبٍ على الرجال يشكي ظروفه"!
هذي ظروف أشكال واحجام وانواع
فأبعد سنه بين السنين محذوفه
والشاعر اللي يدخل قلوب وأسماع
مطيحه اقرب لا كتب من وقوفه
مكشوف للعالم ولو يلبس قناع
وهذا سبب حزنه وهمه وخوفه
واللي يدور من ورا همومه ابداع
ميت ولو عاشت بموته حروفه
لو للمشاعر سوق تشرا وتنباع
بعت الرضى وإن زاد بعت الحسوفه
واشري بها فرحة وراحة ومرباع
وأربع سنين من الحياة مخلوفه
ويروح ضيق الصدر وتزين الاوضاع
واكسر رماح الهم واغمد سيوفه
والله ما عاد اكتب ولا اقرا ولا التاع
وأمر درب الشعر كله واطوفه!