خواطر من فوق السحاب

** والله ده يوم المنى لما يفضوا القاهرة من اشغالات الطريق والباعة الجائلين
بس منى كانت هتفرح اكتر لو كانوا عملولهم الاول مكان بديل عشان مايرجعوش تانى او يطلطعوا ع القهاوى !!
الأولويات بعافية:
** ( عاكسها بس اوعى تلمسها ) ..جملة مكتوبة على ضهر توكتوك !! يا سلاااااام الجملة دى بتبين قد ايه سواقين التكاتك بدأوا يتبنوا الفكر التحرشي الوسطي الجميل !!
الصبررررر ياااارب
** يا جماعة خبرر عااااجل بجد خطير ..اللى عنده اكونت EBay لازم فورا يغير الباسورد بتاعه لان حصل هاك عليه واتسرقت معلومات العملاء ع النت من اول اساميهم وعنواينهم لارقام حسابتهم !! ناس كتير بتستخدم الموقع ده !!! شير و عرفهم !!
** امتى الناس تفهم إن كلمة "ابن ناس" ملهاش أي ستين دعوة بكلمة "فلوس" !!!
** رقاصة تعتزل تبقى مذيعة
مغني صوته حشرج بقى مذيع
صحفى زهق م الكتابة بقى مذيع
ممثل مش لاقى شغل بقى مذيع
لاعب كورة اعتزل راح اشتغل مذيع
سياسي عايز يتلمع بقى مذيع
دكتور بليل ف العيادة والصبح مذيع
طباخ بيقلب عيشة عمله برنامج وبقى مذيع
اى خبير ف اى افتكاسة .... هاته يذيع
طب واللى طلعت عينهم ودخلوا اعلام ..ودرسوا صحافة واذاعة وتلفزيون واعلان ...واخدوا دورات لغة عربية ونحو و القاء ..ثم طلعوا اوت اوف كادر ..ثم مسجل ..ثم هوا ... ثم اتمرمطوا ......يحجزوا على أى قهوة بالصلاة على النبي ؟؟؟
إعلامية بالتلفزيون المصري