مرفوض عذرك

لا تشتكي واجه محاذيف الأقدار=ما بستمع شكواك مهما ترجيت
لا حجة تنفع ولا كثر الأعذار=قابلت صبري بالغرور وتماديت
واجه مصيرك لا عزيمتك تنهار=والأمس لا تنساه شف ويش سويت
تضحك وأنا اتقلب على صالي النار=متجاوز كل الحدود وتعديت
جسر الهوى ما بيني وبينك انهار=ولا شك ما بتفيدنا قول ياليت
شدى بها فريد مع نغم الأوتار=يومه يقول يا ليت ما عمرت بيت
اختارلك غيري ونا بدوري اختار=تعبت من زايد غرورك ومليت
والصورة اللي اهديتها تقول تذكار=خذها فقد شوهتها وعنك قفيت
لا للرجوع ولا لتلفيق الأعذار=مرفوض عذرك حيث انا عنك صديت
وامسح بمنديلك عناوين وأسرار=كتبتها لك واعترف اني اخطيت
اقولها وكلي ثقة وعزم واصرار=بفراقك افرح وانعمي منك ليجيت
ما عاد لك في عالمي اي اسرار=مسحتها ومن جرح قلبي تعافيت