ميزات وعيوب

عبدالله الطلحي اوكما يطلق عليه (شاعر الحكمة) يتميز شعره بالسمو وبالسلاسة والعذوبة التي قل أن تجتمع في شاعر سواه، اقراوه في قصيدته (ميزات وعيوب) لتدركوا ما يرتكز عليه من إبداع ولتستمتعوا بالشعر وعذوبته.. يقول:
قديش تخدعني المظاهر ولا اتوب=ماكنها مرّت عليّ التجاريب
كم واحدٍ يعطيني الهرج مقلوب=وانا اعتبرته من خيار الأصاحيب
الفرق بين الناس في عقول وقلوب=واسرارهم يعلم بها عالم الغيب
العين ماتكشف لك اللي ورى الثوب=كلٍ يظن ويخطي الظن ويصيب
اللي يودّك مايرى فيك عذروب=واللي شناك يحط فيك العذاريب
إن كان ولينّك من العقل موهوب=لا تستمع لمروّجين الأكاذيب
كم من حديثٍ قد لقيناه مكذوب=على النبي اللي منزّه عن العيب
العبد في دنياه غالب ومغلوب=والعمر جاري والليالي دواليب
يجمع مع الأيام حسنات وذنوب=والستر ظافي والعِبَر بالعواقيب
اصبر على الدنيا ترى الصبر مطلوب=واستخدم الحكمه وحسن الأساليب
واحذر تلجّ عواك في كل عرقوب=محدٍ بقايل وش مسرّيك ياذيب
ولا يعتريك الهم والرزق مكتوب=مضمون لك مافيه شكٍ ولاريب
كثر الطمع يدفعك راضي ومغصوب=للبخل والعزله وترك المواجيب
والنفس لاتارد على كل مشروب=حتى تورّدها لصافي المشاريب
لاتندفع معها ورى كل محبوب=وتعلقك في حبال الآمال وتخيب
الناس قالوا كل ممنوع مرغوب=والعاقل اللي يشغل النفس بالطيب
وإليا إمتطيت من الجهل كل مركوب=ضاعت سنين العمر من غير ترتيب
إن كان ما تحسب ترى العمر محسوب=في كل يومٍ تطلع الشمس وتغيب
ولابد تطلع فيك ميزات وعيوب=واقبح عيوب الرجل عيبٍ على شيب