الواقع المذموم

هاك التجارب وسط بيض المظاريف
كلٍ يموت وحاجته ما وجدها
ياما فعلنا فالاوادم معاريف
وطيبهم الي يارفيقي جحدها
في هالزمن مال الصداقات تعريف
قفت لياليها وقفى سعدها
الناس مختلفه وفيها تخاليف
ولاعاد نعرف كلبها من فهدها
الواقع المذموم كله تخاريف
والخافي أعظم منه وأمر وأدها
ياما جرالي في زماني تكاليف
وشربت من كاس المرارة نكدها
مغير أسلّي خاطري بالسواليف
واحيان حتى ضحكتي مفتقدها
هيَضتني والشعر واقع وتأليف
وحبه مثل حب الهنوف لولدها
يسوقني من دهر الايام للرّيف
وأسج به في راحتن لابعدها
ارقى وعدّي به طوال المشاريف
ونقى بسوق الغاليه وافتردها
لقفن هواجيسي وجنّي مناكيف
سبّحت فبحورٍ طويلٍ مددها
اكتب وتصغيلي عقول العواريف
إلي تحل رموزها من عددها
مره عتب صاحب ومرات توصيف
ومرات من جور السنين وضهدها
ومره غزل في لابسات النفانيف.
لالوحت بنت المفاتن بيدها