قصيدة “لعب الهوابيل” للشاعر ” عبدالله بن سمران”

انا عشت تقريباً معك حول سبع سنين
لقيت الحياه اللي منول مضيعها
••
من اول ماحبيتك وانا فا اول العشرين
موقف لك الدنيا على روس اصابعها
••
تمر السنين اللي معك مثل رمشة عين
تقولين رجعها وانا شلون ارجعها
••
بغيتك من البارح وانا وين وانتي وين
صدوف الليالي ماتخلي طبايعها
••
اقبل هوا دارك من الشرق بُعدك شين
يدل الهوى دموعي ويبخص مواجعها
••
يذعذع وجوفي فيه نار احمر السكين
ماغير انطحه وضلوع صدري مشرعها
••
تحريت لك من شهر تشرين الى تشرين
وصلنا لحاجاتن ماكنت اتوقعها
••
تقولين احبك عقب غربه وبعد وبين
ياللاه احبك صدق انا وين سامعها ؟
••
لا ولى نصيبي جعلي مابكيك لاتبكين
سيوف الحياه احلامنا من قلايعها
••
حياتي بدايتها الا مغامر وصبر ودين
هروج الرخوم اموت مانيب طايعها
••
عطيت الوفا والطيب لاخواني الوافين
وابعطي لو ان ما في يدي غير اصابعها
••
ياويلي على المحدار والبدو والسالين
وبنات اوضحن لعب الهوابيل تشلعها
••
اغيّب مع الطياح وانتي علي تطرين
وانا ودي بنسيانك وسجتي معها
••
لاصار اللقا بعدين ياكرهي بعدين
فلانيب راجيها ولانيب تابعها
••
لاضاقت علي الارض تكفين لاتضيقين
يوسع علي اللي عيونك موسعها
.
.
الشاعر : عبدالله سمران