ديوان المجد للشاعر مسفر بن نومه

الحمد لله على حكمه وتقديره
آمنت به واقتنعت بحسن تدبيره
***
ولا لي اعتراض على ما قدر ودبر
سبحانه الخير في ما اختار والخيره
***
والمومن اذا ابتلي يصبر ولا يجزع
يومن بحكم القدر من شره وخيره
***
والحمد لله صبرنا ماتذمرنا
يوم المصيبه علينا صارت اكبيره
***
وقف لها اللي عساها تبطي سنينه
شيخ من المشكلة ما ضاع تفكيره
***
قال المصيبة عليّ وحلها بيدي
من بعد ماهي كبيره صارت اصغيره
***
شتاتنا جمعه مافرق عياله
واحد على يمينه والآخر مياسيره
***
عيال اخوه التووا بالبشت واذراهم
بشت يذري من البرد وزمهريره
***
بشت على متن شيخ يمن الخايف
في ضف بشته تغانينا من الجيره
***
عمي وأنا بافتخر في عمي محمد
من سو الايام جعل الخالق يجيره
***
يابو سعيد أنت قدوتنا ومحزمنا
وأنت الذي بعد ربي ما لنا غيره
***
ياتاج راسي ويا عزي ونوماسي
تفداك نفسي من الوقت ومعاصيره
***
نومستنا جلعلها ما تقصر حبالك
وكتبت في صفحة التاريخ لك سيره
***
أفرحت من حبك ولجمت عدوانك
واسقيتهم علقم في الكبد تأثيره
***
فعلك يداوي الجروح ويبري العله
ياذخرنا كل ما دق الزمن زيره
***
وعيالك رجال لا تنقد ولا تفقد
صغيرهم للمراجل يشعب بعيره
***
ما قلت قالوا وهم من ياصل الحروه
البيض ترفع لهم من ديره لديره
***
وأنا بخيص بهم ماني بجاهلهم
أعرف مواقيفهم لا شبت النيره
***
هم عزوتي في نهار يظهر الخوه
لا شان وجه الزمان وبان تكشيره
***
أماري بفعلهم وأطرب لطاريهم
فزعاتهم تجبر اللي صعب تجبيره
***
من دونهم لو تروح الروح تفداهم
من دونهم ماتساوي روحي شعيره
***
ويالله يا خالق الانسان من طينه
سبحانك أكملت تكوينه وتصويره
***
رحمتك لسعود واقبل صالح أعماله
اقبل صلاته وتهليله وتكبيره
***
واغفر ذنوبه من اولها ليا اتلاها
ياغافر زلة المسلم وتقصيره