قصيدة حصرية للشاعر سداح العتيبي

يا وسع صدري مير صدري لا ومره الله يضيق=حزم ضلوعه وأظهر اللي راكنه ف أركونها
واللي ما يظهرها الزفير .. يتلها تل الشهيق=لابد مع جر النسم ما ينكشف مكنونها
صابر وأنا بين الرجا والياس والجرح العميق=ما تنومن شهب الليال إليا تغير لونها
يوم أحتمى الميقاف وجا للغيض فيض ونشف ريق=وقامت تجر المخطيه بين العباد لحونها
خليتني يا حادي ركابي على حيد الطريق=والمعرفه هانت وشانت واختلف قانونها
ناتج علاقتنا على ماقيل علمن ما يليق=بضاعة بادت قبل لا ينفتش كرتونها
منته ب أخوي من الرضاع ولاني أخوك الشقيق=واللي تحطك سدها بكره تجي من دونها !
غيبت من بعض العلوم الحامضه وأزريت أفيق=ما يذبح كبود الرجال ألا وساع طعونها
أختار ف الثنتين .. وأنته لا عدو ولا صديق=والأوله يا صعبها .. والثانيه ياهونها
وأعرف ترا ما الله محمل عبده بما لايطيق=والناس حسب حظوظها وفوقها وظنونها
شكرك على جنحانك إليا طرت يالحر الطليق=لو يمك فروخ النعام مبحلقات عيونها
أول علومي كنت أجر الصوت للغصن الوريق=وآخر علومي بشروا ليلى عقل مجنونها
سداح العتيبي