« نهديهم لنهديهم » !

اجلح : مسيت بالخير ايها العشير اسمع هالخبر وابي تعليق منك عليه يقولك السعودية على الرغم من عدم تاهلها لمونديال البرازيل إلا انها مشاركة بفرقة فنون شعبية تروج لفولكلور المملكة .
املح : هلا بك زود ياصديقي العزيز .. واما تعليقي فهو الله يقويهم ويعطيهم العافية .. بس متهيألي ان فيه شي احسن من هالمشاركة ؟ .
اجلح : شنهو الاحسن منها ؟ .. على الاقل طلعوا احسن ربعنا بالكويت اللي يتسابقون على اشتراك البي ان الرياضية اللي كل يوم لها سعر !
املح : الاحسن هو اللي الفكرة اللي تبنتها هيئة القران التابعة لوزارة الاوقاف .. والفكرة تتلخص بشحن كتب لترجمة معاني القران الكريم من اجل توزيعها بالبرازيل خلال فعاليات كاس العالم .. وكميتها 250 الف كتاب وباربع لغات هي البرتغالية والاسبانية والفرنسية والانكليزية .
اجلح : الله يجزاهم خير وعساهم على القوة .. وهذا والواجب على المسلم بان يقوم بواجب الدعوة .. الله يجعله بميزان حسناتهم ويوفق الجميع لطاعة الله عز وجل هذي الافكار والا بلاش .
املح : وابشرك بعد أعلنت لجنة زكاة الفردوس عن قيامها بإعداد وطباعة 50 ألف «دي في دي» بعنوان «الإسلام دين السلام» مترجمة ب64 لغة أجنبية من أجل توزيعها في المونديال المرتقب .. وترا باب المساهمة مفتوح للي حاب يساهم .
اجلح : الله اكبر عليهم هذولا هم عيال الكويت بارك الله فيهم .
املح : تدري يا اجلح بان عملهم هذا جاب لهم القيل والقال من بعض الناس الله يهديهم .. قال يقولون انه الشباب حاطين سالفة التوزيع حجه علشان يحضرون كاس العالم واللي يقول ان الجماهير ماهي فاضية لكم ولدعوتكم لان الوقت مو مناسب .. واللي (خبقها) قال ايه ان الكويت ماهي بحاجة تشويه سمعه (سود الله وجهه) وربطها بالتشدد وغيرها من الامور الاخري التي قد نتهم بها جزافا .
اجلح : يازينها من تهمة ..أسأل الله لصاحب الفكرة أن تنفذ فكرته وجزى الله الكويت خيرا وكل من اعان .. واسأل الله الهداية لكل من يحاول يخذل اخوانه .
ألووو اخير
رياضتنا بلا منشأة وبلا احتراف وبلا دعم .. للنهوض بالرياضة الكويتية «ايد وحدة» تدعوكم للاعتصام الرياضي يوم الثلاثاء القادم 3 يونيو الساعه 6 مساء امام صالة الشهيد فهد الاحمد بالدعيه .

محمد خلف الشمري
إعلامي كويتي