يمكن فيه كثير ما يدرون عن كثير من الأمور اللي تصير بنادي الشباب، لانه نادي صاد شوي، ولاحد لمه، وهالشي فيه منافع وفيه مضرات كثيرة، لاعبين نادي الشباب كانوا لا لعبوا أي مباراة يلعبونها وانفوسهم مرتاحة على الاخر حتى لو كانت مباراة كأس، عشانهم لا خسروا ما حد يتجمع حول النادي ويحشرهم ليش ضيعتوا البطولة، ما خذين راحتهم على الاخر، ومن سلبيات هالشي ان لاعب نادي الشباب يظل يفحط لين تطلع روحه يا دوب ينظم للمنتخب، عشان المنتخب معروف الأندية اللي ينضمون لاعبينهم له، من انولدنا وحنا نعرف ان المنتخب يكون اكثره من الاربع الأندية الجماهيرية، وباقي الأندية يا دوب لاعب او لاعبين، ولو اخطأ أي لاعب من لاعبين هالأندية الغير مشهورة تلاقيه ثاني يوم برا المنتخب، ولو اخطأ لاعب من نادي جماهيري يعتبرونها كبوة جواد وتمشي الامور، ما فيه لاعب خدم المنتخب زي فؤاد انور ووصله لدور الست طعش بكاس العالم، الحين وينه، في ادارة وحدة من المنتخبات؟، ما سك مكان في الاتحاد السعودي؟، ابد، ما سك خط ويدور على رزقه زيه زي أي مواطن ثاني، فاز سعيد العويران بثالث اطلق هدف على مستوى العالم، ويالطيف لو كان الفايز هدف لاعب في بالي، كان للحين بعض الجرايد تطبل، بس عشانه سعيد لاعب شبابي، انشروا الخبر بيومين، وبعدها لا من شاف ولا من دري، كنهم ما هم فاهمين وش معنى ثالث احسن هدف في العالم، يعني اسم السعودية لمية سنة جاية راح يعرفونه كل اجيال العالم، المهم ما لنا في الكلام اللي يغث، خلونا بموضوعنا، اللي هو كثرة اصابات لاعبين الشباب وبالذات في الرباط الصليبي، الفريق كله الا يمكن لاعب او اثنين ما نصابوا بالرباط الصليبي، شي مو معقول، كل اسبوع او اسبوعين ينصاب لاعب شبابي بالرباط الصليبي، قالوا يمكن السبب ارضية ملعب النادي، بس ظني والله العالم ان السبب هو في طريقة تدريب اللياقة، اتذكر يوم كان عبداللطيف الحسيني الله يذكره بالخير ما سك تمارين اللياقة لنادي الشباب ما كنا نسمع عن أي اصابة، طبعا عبداللطيف الحسيني اعتبره من احسن مدربين اللياقة مو بس عربيا والله انه على مستوى عالمي؟، وتابعوا أي نادي يدربه لياقه وشوفوا كيف مستوى لاعبينه وتحملهم للاصابات، مدرب لياقة ما فيه اخوه بالملاعب السعودية، قبل نادي الشباب ما يدور بدلاء للاعبين المصابين بالرباط عليه اول شي يرجع عبداللطيف الحسيني بأي ثمن، تراه هو الحل السريع اللي باذن الله راح تشوفون نتايجه
