حتى لو كنت بياع بطاطس في الشارع ولا لك دخل في الكورة من تشوف النادي الأهلي يلعب مباراة تعرف ان مدربهم فيه فتق براسه يبين من ورى الشاشة اللهم لا شماته، كن فيه حالة نفسية تجيه لا بدأ الشوط الثاني، لا شفت لعب الأهلي الشوط الأول تنبسط تحس ان أهلي زمان اللي نسمع انه كان سبع البرمبه بس ما شفنا تحس ان هالبعبع رجع، خصوصا من جاهم المدرب الجديد فارياس، غير جلد الأهلي بس في الشوط الأول، بس لا جاء الشوط الثاني تجيه حالة نفسية تخليه يحوس الدنيا بتغييراته اللي مدري وش يبي فيها، يا ناس فهموني كيف مدرب فايز فريقه في بطولة آسيوية ثم يركب راسه يبي يفوز عشرين صفر، شوي والا هو ساحب روس الحربة ومطبب بدالهم روس حربة ثانيين، ما تمضي عشر دقايق من تبديلاته اللي تجيب الصداع الا ماكل على راسه كم هدف، كم مباراة ضيعها فارياس بنفس الطريقة، ليت لي سلطة على النادي الأهلي كان خليت هالمدرب يدرب الشوط الأول بس، ثم لا جاب الأهلي هدفين وبدأ الشوط الثاني قلت له: فارياس يا بعد حيي شرايك تروح تجيب جوالي من سيارتي في البيت واترك الفريق عندي، بصراحة الأهلي ما يستاهل اللي يجراله، وش هالمدرب اللي قلبه قوي يطلع مالك معاذ ويطبب مهاجم ثاني، ترى الأهلي دحدر من قام يجيب مدربين يحبون الفلسفة واجد، والله يا فارياس لو عندك مخ وبس شفت مالك وهو يجيب هدف التكسي انك ما تطلعه لو يلعب وهو ينقز على رجل واحدة!
