كلام زي الهرج

سبحان الله تتطور امثالنا كل ماتطورنا، قبل الجرايد كانوا الناس يقولون كلام نسوان يعني كلام كثير وصدقه قليل، ولا يزعلون منا النسوان نقول ان فيه حريم اخوات رجال وكلمتها مثل كلمة الرادو ماتنعاد، وبعد دخول الجرايد مجتمعنا، صاروا الناس يقولون كلام جرايد يعني كلام خذ وخل، كميته كبيره وصدقه قليل مع اعتراضنا على هالمثل لكن وش نسوي بمجتمعنا وامثاله، الحين الناس طلّعت مثل جديد يقول (كلام نت) يعني كذب في كذب، والحقيقة ان هالمثل صحيح بشكل كبير حيل؛ لأن النت الله يكفينا شرها صار فيها تلفيق وعدم خوف من الله، صار أي منافس لشركة يبي يدمر سمعتها يفبرك ايميل منتجات الشركة الفلانية تسبب السرطان ويخلي هالشركة تدفع الثمن غالي لأن مجتمعنا صار ما تدري شلون هو قايل، مرات يصدق بسرعه ومرات ودّك انه يصدق ولا يصدق، بس الاكيد ان الانترنت صار يتفبرك فيها كل شي، حتى لقطة الفيديو ممكن ينلعب فيها وتلاقي انسان أو انسانة مساكين لا ناقة لهم ولا جمل متورطين بلعبة فبركة لقطات فيديو؛ لأن الكمبيوتر يعطيك تسوي على كيفك بالصورة والا بالفيلم، يا ربي لا تبلانا عالم الله يستر من اخرته، هالتكنولوجيا لا صار ما فيها ضمير ممكن تدمر ناس كثير، ربي يحمي اعراض الناس ويفكها من مجرمين النت، قولوا آمين.