النادي (المعيون)! (2)

يجي المحترف جايب اقلام بجيبه عشان التواقيع ومتمشط زين عشان التصوير، واول ما يطلع من المطار يوكلونه من مطعم صيني عشان ما يختلف عليه الجو ولا يبون يصدمونه بالحقيقة المرة انه بعد كم يوم ما راح ياكل غير كبسة، وبعد كم يوم يطيح بالكبسة ولاطاح بالكبسة يفهمونه ان الكبسة بدون ببسي مثل الشاي بدون سكر، اول ليلة ينام على طول من تعب السفر، ثاني ليلة يفكر يهج من ضيقة الخلق، كل نصراوي يحاول يفهم المحترف انه أهم واحد بالنادي وانه هو اللي يدفع على النادي وممكن يفصل ويوظف، يتوه لين ما عاد يدري منهو بيده، المحترفين اللي يجون النصر مدعي عليهم، وبعد كم يوم من الاحتراف يطقهم الهم لين ينحفون ويعصقلون، كل محترف باي نادي لالعب مباريات يتطور مستواه من مباراة لمباراة الا في النصر، يدحدر المحترف جسميا ومهاريا لين تقوم ما عاد تفرقه بينه وبين درويش سعيد لاعب النصر قبل عشرات السنين، هذا غير قلة السنع باختيار اللاعب المحترف من الاساس، سبحان الله ما يحلى بعيونهم غير اللاعب اللي يا دوب يمشي وطاقة هزال، تنقهر لما تشوف نادي يملك كل هالقوة الجماهيرية ولا عنده محترفين سنعين، الشكوى لغير الله مذلة! يفرجها ربك، كلها مية سنة ويتحسن الحال باذن الله، نصبر وش ورانا! الموسم الجاي كلنا متفائلين بجية كحيلان، ومتوقعين أنه يقدر يرجع النصر حق زمان.