عطني حظ

كل ما تفكر بهالدنيا مالك حل غير انك تقول من قلب يا سبحان الله، الدنيا ألغازها كثر نفود الدهنا، ولاصار عقلك ماهو على كراسيه تلاقي نفسك بعد كم تفكيرة تقط خيط وخيط، مع اني أنصح اخواني انهم يريحون انفسهم ولا يتعبون مخهم بالتفكير، لان المخ حقنا مو مخ تفكير، يعني مثل السيارة الصغيرونه ما تقدر تمسها خط، يعني تخبط لامشيت عليها طريق طويل، وكل يوم تطلع لك شغلة تلخبط برمجة مخك، وتخليك تعيد حساباتك من جديد، تجيك ايام تحلف ان الواحد او الوحدة (عشان خواتنا القارئات ما يتهمنا بالعنصرية) تحلف ان الدنيا كلها حظ بحظ، وان الحظ يخليك تسقط على ناس انت ماتجي ربع مخهم، تلاقين بنت جيرانكم مافيها لا ملح ولا قبلة والخواطيب طالعين داخلين كنهم في مطعم مندي وانتي اللي شحلاتك وشحليلك مايطق بابكم غير عمال المطاعم اللي يوصلون الطلبات ولاعطيتهم الحساب يقولون لك ما في صرف عشان يلهطون الباقي ويهجون، تلاقي نفسك لاعب محترف لو شرحوا مخك وعضلاتك غير تطلع احسن لاعب بالسعودية وجالس احتياطي للاعب ملحط جايبه ناديك من الحواري بعد كل مباراة ينومونه بالمستشفى عشان يلزقون عظامه اللي تمصعت، الحظ يلعب دور بحياة الانسان العربي بشكل يطير أبراج العقل (ترى أبراج العقل مثل أبراج الجوال أحيانا تفصل)، واللي قال عطني حظ وذبني في البحر انا اشهد انه ماكذب، وش الفرق بين ابو حظ والمقرود؟ ابو حظ يوم ذبوه في البحر مر من جنبه سمك قرش كان ماكل ركاب سفينه قبله ويسوي رياضه عشان يهضمهم وشات الموج ورمى ابو حظ على الشاطي، والمقرود مروا جماعة سمك القرش اللي اكل ركاب السفينه وزعلانين انه قلط العشاء ولااحتراهم!