مفعول الورقة (الصفرا)

بعض المدراء ما يعرف يتعامل مع موظفينه غير بالأوراق الرسمية مقاس اي فور عشان يحسس حاله انه مالي الكرسي، كن ما في الدنيا غير هالاي فور، كل شوي صافق موظف بورقة لفت نظر والا بورقة خصم والا بورقة فصل من العمل، ماكن فيه أوراق أخف شوي واحلى على القلب وتحسسك ان مديرك قريب من قلبك ولا يدور عليك اي زله، ودي المدراء يجربون هذيك الاوراق الصفراء الصغينونة يكتبون عليها ملاحظتهم عشان يربون علاقة الود بينهم وبين الناس اللي في ذمتهم، الكرسي حق المدير كرسي حلاق، والكرسي حق الموظف كرسي حلاق برضو، ولا دايم غير وجهه سبحانه وتعالى، يا زين المدير اللي يقلب جو العمل جو عايله وحده قلوبهم على بعض، خففوا من طبع الاوراق البيضاء الرسمية، جربوا الوريقات الصفراء الحبوبه اللي لاجيت الموظف اللي تحت ادارتك يحتفظ فيها بقلبه ويخجل من تقصيره ويعرف انك مدير واثق من نفسك تساعد موظفينك انهم ينتجون بشكل افضل وارقى، كثير من الموظفين مثل حالاتي عله من العلل ودك تذبحه مو بس تعطيه ورقة خصم والا لفت نظرك، وكثير موظفين عندهم نواقص يكملها حرفنة مديرهم وخوفه على موظفينه كنهم اخوانه الصغير، ربي يكثر الاوراق الصفراء ويكثر المدراء اللي يفهمون فايدتهم وفاعليتها وقوة تأثيرها على الموظفين اللي يعلون الكبد ويجيبون القرحة، فتكم بعافية.