صدري مقابر

ما بين صدري والمقابر علاقات
بالاسم والمعنى ودفن الضحيه
الفرق “بن” المقبرة تحضن اموات
وانا دفنت اشياء بالصدر حيه
دفنت حبك عن هروج السخافات
ودفنت شوقي عن عيون البريه
ودفنت في صدري غرابيل وآهات
واسرار نفس ٍ من زمنها شقيه
أمنتك الله يا بعد راس الابيات
يا ملهمٍ قافي صباح وعشيه
إن حل بي طاريك وقفت بسكات
وان زارني طيفك عطيته تحيه
من زود حبك ما حسبت المسافات
ومن زود شوقي ما تهم المنيه
مدري علام القلب يهواك بالذات
وعروق شوقه بارض حبك نديه
يمكن لانك كنت أول بدايات
حبه وأنا مديت به لك هديه
ان قابلك ضمه وقل له سلامات
لانه قبل يومين صابه شظيه
تذكّرك وانهار والنزف حسرات
على زمانك والعلوم النقيه
ولملم شتاته حزن وهموم وآهات
ودفتنها بالصدر يا زين حيه