قبل لا أخش بالموضوع ودي أخش بموضوع ثاني (مالت على من علمك الشرح)، ودي اتعذر واشجب حبي (اهب يالفاهم) لإخواني القراء اللي يوميا يمحطون إيميلي برسايلهم الله لا يحرمني منهم، كل ما فتح إيميلي اطالع في المراية وأنا أبتسم وتلمع نجمه بعيني زي أفلام الكارتون من الوناسة والانبساط وأقول لخشتي في المراية: اخس يابو العريف صار عندك جمهور، المشكلة إن نص الإيميلات ينشدني ليش عن النص الأولاني، وكنت ناوي أحول ردودكم للجريدة عشان ينشرونها لكن يوم فتح الإيميل بيوم من الأيام وألقى الإخوان في الهوت ميل الله يقلعهم قاشين كل شي ومخلين البريد حقي على البلاطة، الموضوع اللي نبي نسولف عنه اليوم موضوع يخص الحساب البنكي حق السرقان، بصراحة فكرته تهبل، واللي اخترعه يستاهل جايزة كاس الدوري، والسروق ماله حل غير إنك تخليه يرجع اللي سرقه وتسوي حالك كنك ما تشوفه، الحين عقب هالحساب صار السراقين ما لهم عذر إنهم للحين لاهطين قروش المسلمين ويقدر ينامون مرتاحين، يا حرامي يا حبوب خلاص ما طابت نفسك من لهط القروش، قم وخذ لك ركعتين وتعوذ من الشيطان ورجع حلال المسلمين لهم! ودي أقول إن هالفكرة ممتازة بالحيل، يا زين الستر زيناه، ما فيه أحسن من الستر لاحس الواحد اللي أخطأ إن ربي عطاه فرصة وستر عليه لازم ما يطوف هالفرصة!
