(المطب) اللي ما يصيب يدوش!

يمكن لو فيه بالامم المتحدة ناس متخصصين بحقوق المطبات الصناعية زي ما هم متخصصين بحقوق كل شي يمكن تطلع بلدنا رقم واحد في عدد المطبات ويطلعون تقرير يطالبون فيه بعدم اهانة المطبات واحترام حقوقها وتخفيف الوطي عليها بالسيارات عشان هي من الاساس تكون كارهه نفسها من قوة الشمس الحارقة عندنا، والحقيقة ان المطبات عندنا لاقية حقوقها وزيادة ومدلعه ع الآخر، لأن المواطنين بدو يتدخلون في انشائها قدام بيوتهم ويتفنون في زبرقتها، تلاقي مطب كنه نسخة مصغرة من الاهرامات، ومطب كنه جبال السراوات اول ما تجي فوقه تلاقي سيارتك في السماء متعلقه وتكون فرصة مناسبة لك تشاهد منظر علوي لمدينة الرياض، وتلاقي مطب كنه حربايه ما تشوفه الا بعد ما تطير انت وسيارتك في الهواء وتبدأ تجيك اصوات في الاذن من قو الضربة تحسسك ان اللي حصل بفعل الجان ولا تعرف انه بفعل مطب الا بعد ما توديها لورشة يجمعوا لك قطعها اللي كنها مربوطه بسلك كل قطعه تشتغل لحالها، ودنا نقترح على وزارة المواصلات الله يحفظها لنا ويحفظ لنا نشاطها الزايد في حفر الشوارع، انها تصبغ لنا المطبات باللون الابيض حتى يمكن للشخص رؤية المطب من بعيد، بصراحة اللي تسويه المطبات فينا صار ما ينسكت عليه خصوصا العذاب اللي يلاقونه الناس اللي نظرهم ضعيف ونص الشعب يعاني من ضعف النظر!