تعلموا من العمالة

أكثر شي نقدر نسويه لما نشوف عامل أننا نهايط عليه، او نطلب منه يجيب لنا شاي والا قهوة، وفي حالات معينة «نكرشه» بعد ما يجلس ساعة يدور لنا على موقف للموتر ويوم نلبق وتصير الامور تمام.. نقول له «ما في غسيل سيارة..يلا روح!» صحيح ان بعضهم ينشب لك بطريقة سخيفة احيانا بس ما يمنع نعامله بشوية اخلاق، لكن اللي بقوله انا الحين.. ليش ما نجرب نستفيد من هذولي الناس؟
ادري في ناس بتغسل يدها من كلامي لكن ركزوا وفكروا فيها صح، موب لازم تكون فايدتنا بس في الخدمات اللي يقدمونها لنا في المغسلة وفي المطعم وفي الشارع وغيره، ليش مانفكر في شي ثاني.. ياخوي هذولي الواحد منهم يجي البلد وماعنده أي خبرة في أي شي ولا أي مهارة في أي حاجة.. يعني يادوب باخص له شغلة ويجي يطقطق فيها لين يتعلمها زين، لكن عطه سنة وبس وارجع شوفه.. تلاقيه بدل ماهو سواق بس، صار يفهم في الكهرباء والسباكة والخياطة وتصليح الكمبيوترات، وعنده جوال يبيع منه رصيد، تعال بعد سنتين تلاقي عنده بقالة ومشارك في كم محل خضار على كم حلاق!
انا ما اتكلم من ناحية نظامية، لكن شوفوا القدرة على التعلم بسرعة وتنويع مصادر الدخل، موب حنا.. وظيفة وحدة، واي مجال غيرها «والله ما افهم فيه!».