شاهد عيان من الشارع العام، على الأعمال الرمضانية ونجومها.. له وجهة نظره تجاه ماتابع من الأعمال وله رأيه الخاص بالطبع.. - وش اسمك؟ عادل سالم - وش تابعت في هالشهر من مسلسلات؟ تابعت كثير. - وش اللي شدك منها؟ بصراحة فيه أعمال تشدك في البداية وفي النصف تضعف وفيه العكس وفيه أعمال قوية من بدايتها لنهايتها. - طيب أي الأعمال شدك من البداية وبعدين ضعف وأي العكس؟ كان مسلسل اسمه أيام الفرج بدايته حلوة بس في النصف أحسهم بدو يضعفون حتى في الأداء ومسلسل زوارة خميس بدا ضعيفا وضبط في الأخير، أما ليلة عيد قوي بصراحة من بدايته إلى الحين. - طيب والأعمال السعودية طاش وسكتم بكتم وغشمشم ومزحة برزحة؟ أحس مزحة برزحة ظلم بالتوقيت وإلا شكله حلو خصوصا أنه من بطولة محمد العيسى، وطاش هالعام مو ذاك الزود وسكتم بكتم مثل بيني وبينك ماهنا فرق نفس الطرح والفكر. - محد عاجبك أشوف؟ تبيني أجامل هذي وجهة نظري؟ - من الممثلين اللي شفتهم هالعام ولفتوا انتباهك بحضورهم؟ خلنا نستثني ناصر القصبي وعبدالله السدحان لفت نظري شاب مشارك في بيني وبينك أعتقد اسمه فيصل العمري. - طيب تابعت هوامير الصحراء؟ لا ما تابعته بس ما يمدحونه يقولون كله فشخرة ومظاهر. - أي الأعمال تحس أنه أقل من النجوم المشاركين فيه؟ تصدق فيه مسلسل نجوم بس الفكرة من أبو ريالين. - وش هو؟ مسلسل كويتي اسمه «أنين». - والبرامج تابعتها؟ أتابع مسلسلات حليمة بس. - طيب والبرامج الثانية مثل الكاميرا الخفية والدينية؟ الدينية أتابع حجر الزاوية يوميا، أما الكاميرا الخفية فهي ضحك على الذقون والمشكلة إن القنوات تعرضها على أيش مدري.
