حرامي وأربعون سرقة

قبل أمس ناشرين اخويانا حقين الاخبار المحلية ان الشرطة قبضت على السروق اللي سرق اربعين مرة، يالطيف اربعين مرة يسرق ويفلت ولاحد صاده،اللي نخبره ان الحرامي لاسرق مرة مرتين الثالثة ينصاد، وش هالحرامي اللي لابس طاقية الاخفاء ويروع عباد الله ولاحد صاده الا بعد اربعين جريمة سواها، الحين كني اشوف بعض الحرامية العليمية لاقروا هالخبر ترتفع معنوياتهم وبعضهم يقول في نفسه ياحلالات لو سرقت بس ثلاثين مرة ولا صادوني كان اغتنيت وتبت، كثرة السرقات وانتشارها اكيد سببه تعود الحرامية وكلها كم شهر سجن ويجيك السروق يبرم في الحارة مرة ثانية، ويتعاملون معهم بالسجن اطلق معاملة، اكل شارب نايم، يعني يعتبرونها الحرامية انها استراحة محارب، ويرجعون كاسبين خبرات جديدة من الحرامية اللي انسجنوا معاهم، لكن لو تم تطبيق شرع الله فيهم، والحرامي لانمسك انقصت يده، كان ما عاد احد يفكر يسرق، صاروا الحرامية يطمرون على البيوت بكل قواية عين، ويا ويلك لو تطرده، والا تصيبه، على طول تروح فيها، لأن الحرامية كلهم دشير وسمرمد متفقين على عذر واحد لانمسكوا داخل البيت، يقول لك فيه ناس يطاردوني وطمرت البيت منحاش منهم، ترى وضعنا مع الحرامية زاد عن حده!