الطالب (نيوتن)!

ودي أسوي اجتماع بطلابنا المتخرجين توهم من الثانوية العامة واجيب لهم اقوى طبيب نفساني عشان يخفف عنهم اللي يعانونه هاليومين من الضغوط النفسية، اللي طلع اسمه مقبول واللي ما طلع ولا يدري ليش، واللي منكوب باختبارات القياس أو القدرات، وحسب خبرتي ومعرفتي بكثير من دوافير الدراسة وبعض المختصين بالمصاقيل استطيع أن أؤكد من هذا المنبر أن اخويانا بعد كم سنة راح يتراجعون عن سالفة اختبارات القدرات والقياس؛ لأنها سالفة ما تخش المخ، سالفة ما من وراها فايدة غير زيادة تعقيد، الحين بالله عليكم معقول الطالب المسكين يكد ويكرف طوال ثلاث سنين وبالاخير ينقال له: اصفط على جنب شهادتك ذي بلها واشرب مويتها تعال نختبرك من جديد، يعني لو جبت 100 بالمية بالثانوية بعد ما يمحطونك باختبار القدرات والقياس ممكن تطلع يا دوب جايب واحد و90 بالمية، واللي يقهرك ويزيد ضغطك ان واحد من هالاختبارات بس مرة وحدة، يعني لو اختبرت وانت مريض ولا توفقت فيه، راح كل تعب عمرك هدر، سالفة القدرات والقياس هذي تذكرنا بسالفة الثانوية المطورة، قعد الطلاب المساكين يهابدون فيها سنين وبالاخير اكتشفوا انها من جنبها، اكيد ان اللي اتخذ هالقرار عنده اسباب بس مو لاجيت اعالج مشكلة اكمخ الناس بقرار مو مدروس!