بياض الحقيقة

حفظ
أقفت ظعون الغلا والحب لاراح.. راح
ما عاد يرجع ليا منه نوى بالرحيل
أجمع بقايا المحبة.. في مهب الرياح
تبعثرت ما بقا بكفوفي إلا القليل
ذقنا (هماج) الجفا بعد الوصال (القراح)
ليت أول الكاس حنظل وآخره سلسبيل.!
وأيامنا الحاتمية.. والسنين الشحاح
حلمٍ تبدد.. وهمٍ فوق صدري ثقيل
يومٍ بياض الحقيقة ف أسود الوهم لاح
قلت: آه يا قصر صبر اللي عذابه طويل
يا ليل ياللي وهبتك من قصيدي صباح
أثرك ولو زينك نور القناديل.. ليل
تعال ننشر على حبل العتاب الجراح
ما دام واقع محبتنا غدا مستحيل
صرحٍ بنيناه هزته العواصف وطاح
لا شك ما للغرام اللي جمعنا مثيل!
شف طير الأشواق من حزنه كسير الجناح
وشفني «شظايا» من إنسان معذب نحيل
كنا على مفترق درب الخطا والسماح
حتى الفرح يوم جانا كان عابر سبيل..!