كل على ذوقه

كل (ن) على ذوقه وكل (ن) وشفه
والسوق به من كل شف (ن) بضاعه
وأنا معي نفس (ن) كبيرة وعفه
لها جميع أعضاي سمع(ن) وطاعه
ماتقبل اللي باير (ن) فوق رفه
ولايحركها الهوى باندفاعه
وإن رف رمش العين للزين رفه
ذكرت عيني بالرضا والقناعه
اظما ويكفيني من الكاس رشفه
والجوع مايخلف لمثلي طباعه
واللي يطمن للثقيلات كتفه
ماحد(ن) من العربان يلوي ذراعه
لاني بمشقي نفسي ولا مرفه
ولا وحيد ولا تبع للجماعه
وإن قلت كلمة كلمتي ما تسفه
أقولها صادق بحزم وشجاعه
لله در اللي تشبعه كفه
ولا عاش من لا همه إلا الشباعه
خالد رجب