هوى الأمس

عشتك وصل واليوم أعيشك قطاعه
مانته على قِِل المواصيل معذور
انتابني من قِل وصلك فضاعه
حديتني للغير مكره ومجبور
حب الطفل لامه بسن الرضاعة
كان إلك فيني عشته إحساس واشعور
واليوم ماللحب عندي شفاعة
عِقد المحبة صار مرمي ومنثور
اللي قطع حبل الوصل باقتناعه
مثل الذي بدا ظلامه على النور
كثر الصبر مالي عليه استطاعة
والعذر ماله مع كثير الخطاء دور
القلب يعلن عن هواك امتناعه
بعد انكشف له كل ماكان مستور
مافاد قلبي طيبته وانخضاعه
ياما شكا قلبي من اسبابك الجور
ماعاد إلك فيني مشاعر مطاعة
والحب مات ومات نادم ومقهور
من باع حبي مارضيت اتباعه
ودعتك الله ياهوى الأمس مشكور
هاني الزنيد