الخاطر المكسور ماله جبيره

ياداخلٍ في الحب تايه ومغرور
الحب ماتقدر اتوقف مسيره
لامن دخلت احماه وأصبحت مجبور
لزوم بعد العز تلقى الكسيره
مهزوم لوظنيت بالحب منصور
راع الهوى دايم عليه المغيره
في نشوته راعيه مايسمع الشور
لوله على ماقيل عينٍ بصيره
يضيع مع نجلٍ بها الموت مذرور
لارخت هدبها صابت العقل طيره
وقبال بدرٍ لابدا كامل النور
يفهق ظلام الليل عن كل ديره
الحب ينبت بأوله ورد وزهور
أول لياله ساطعاتٍ منيره
ثم يثمر همومٍ بها القلب مخطور
وغارات من هم الليالي عسيره
يترك بقلب المغرم التايه احرور
ويِحْرَق بناره ماحصله عبيره
يصير في غباته اليوم مغمور
ويصبح على كف الحبايب مصيره
يعيش والخاطر امن الوجد مكسور
والخاطر المكسور ماله جبيره
راع الهوى ماحدٍ يراعيله اشعور
حياة حلمه كفنوها صغيره
سرور بن محمد بن حنيان