وصية أسد

مره امشي وصدفه لاقيت الاسد
خايف ومكفي اعلى وجهه
اتقول فارا مو أسد
ساكت ويابس مكانه
كانه ميّت للأبد
مدري شمخوف اسدنه
اتقول نعامه ولِبَد؟
كان مقهور ويعاني
يشكي من وكته النكد
قتله ابو خمّيس عليمن
ليش تصرخ يامَدد
ليش عينك رايحه
وليش ماكلها الُرمَد؟
قال ابورويشد طردني
وهسه باقي بلاوطن وبلا بلد
وقال ابكي من زماني
وعلى ايام السعد
قال عيرني زماني
ومايعدني اصلاًعدد
قال من جرح السان
قلي شيطيبه بعد؟
والزرع ورد بزمانه
غيرعاكول شحصد؟
قتله اهجر هلمكان
تدري من جده وجد؟
قال هاجرت وشفت
الحقد نفس الحقد والحسد نفس الحسد
قال ما امشي يخايب
كلها ضيقه وكالكبد
ردت امشي و وقفاني
وراد من عندي وعد
قال بالك دير بالك
ابد لتأمن بحد
قال نفسك ثم نفسك
ثم مالك لا ولد ولا تلد
تالي ماتالي السوالف
كمل النومه وخمد
_____________________
ابوخميس : الاسد
ابورويشد :كنية الثعلب
العاكول : نبته اسمها شوك الصحراء
بالك : اخذ حذرك