لآلئ شعرية

لا تضيق أخلاقك ويشتعل حلمك حريق
من نزل فعله من العين قدره مارقا
اعتبر نفسك مسافر وهقواتك طريق
لين تقتات السعادة من عيون الشقا
خلّ عزمك للوفا سيف والهامك صديق
العزوم سيوف طاله والاعذار امحقا
لا تفوتك رفقة «ابشر بعزّك يالرفيق»
خلّ رفقة «مر حبابك ودام لك البقا»
من يلدّ العين في بيت الأوهام العتيق
عاش وأحلامه مساجين ويديه اعتقا
لا تقول ان البحر مارحم دمع الغريق
لدّ عينك في قلوبٍ بالأوهام اغرقا
النوايا وضح والوضح منهجها يليق
لا تسيّر وضحك الا على وضح النقا
والفخر قمّة جبل والندم وادٍ سحيق
من بقى قلبه على الصدق فالقمّه بقى
ومن نقل حمله يكفّي يطيق أو ما يطيق
عقّب اللي لارتكى للحمول ولا اتّقى
واحدٍ ما شيف فعله على الوجه الطليق
ماهقوا فيه الرياجيل خير ولا هقا
الصداقة تثمر الطيب والود العريق
كل ما مطر مزنها مهجة الروح وسقى
اصدقاك اللي سعدهم يفرّج كل ضيق
يوم للشدّات ضيقه وللضيق اصدقا
خل حبلك مع حبال الثنا دايم وثيق
واحد ما قد لقى الحمد قلّي وش لقى
العمر رحلة تعب من زفير اليا شهيق
بين لحظات الموادع ولحظات اللقا