دمع العين

الصدر ضاق وعافت عيوني النوم
من هاجسٍ بالقلب محدٍ درابه
يارب فرجها على كل مهموم
ضايق ودمع العين بلل ثيابه
يارب ياقادر وياحي قيوم
اسألك عن قلبي تزيل الكابه
احاول ارقد واذكر الهم واقوم
وابكي وابرد حرتي بالكتابه
وارفع يدي لمنجيٍ كل مضيوم
به استجير برحمته من عذابه
ملك واجيه بلاوساطه على الدوم
مايقفل ابوابه بوجه الغلابه
غني وعنده رزق الانسان مقسوم
قادر ولا يحتار من هو لجى به
الأرض لاجفت لها ترسل غيوم
وبقدرتك تمطر عليها السحابه
يا الله ياللي ناصرٍ كل مظلوم
عجل لنا يارب بالاستجابه