أنسام البراد

ياظلمة الليل وانسام البراد العليل
وياخاطرٍ. قام للقمرا يباري لها
ياليت ماللحضارة والتطور بديل
الا بيوت الشعر والبوش مع خيلها
وصوت السراحين لاطال المساء والرحيل
والبندق اللي تصيد او من معاديلها
وشوفة بروق المخيلة وادراج المسيل
من عقب هلت من القبلة هماليلها
والصبح لاجاء لنور الشمس ظلٍ ظليل
وشعت على البيد عقب اطفوا قناديلها
وجر البساط وتمثني الرمث وسط النثيل
والشعلة اللي تصالي في معاميلها
والنجر لا دِن صوته من كفوف الاصيل
قرمٍ مضرا على الطاله ويزمي لها
وتجمعوا حول ضوٍ للكرامة دليل
زحول ربعه وخيرة قومه وجيلها
ودارت مابين النشامى والمقام المهيل
سوالفٍ جت تبارى مع فناجيلها
مايبهج الروح من تالي ويدني الحصيل
الا علوم السنافي مع تعاليلها
هي سلوة الخاطر اللي شال حملٍ ثقيل
وجارت عليه المصايب وادرج ويلها
ماعاد عنده رفيق ولاصدوقٍ خليل
وازرت كتوفه تهوز حمول وتشيلها
من فوق سجادته يدعي يجر العويل
وترزم ظمايا ضلوعه في مداهيلها